ប្រតិបត្តិ ស៥ ជាមួយគោលការណ៍ PDCA
ដំណោះស្រាយ ស៥ ជាវិធីសាស្ត្រសាមញ្ញ និង មានលក្ខណៈជាប្រព័ន្ធដែលអាចយកមកប្រើ និងអនុវត្តបាន នៅគ្រប់ទំហំ និងគ្រប់ប្រភេទនៃស្ថាប័ន។ ប៉ុន្តែការអនុវត្ត ស៥ មិនមែនជាការងារងាយស្រួលនោះទេ។ ដើម្បីចាប់ផ្តើមការអនុវត្ត ស៥ ជាជំហានៗ គ្រប់ដំណាក់កាលនៃការអនុវត្ត ត្រូវតែធ្វើការវិភាគ ឲ្យបានហ្មត់ចត់ ហើយអាចបញ្ចូលគោលការណ៍PDCA ។
ក. ការធ្វើផែនការណ៍ (Plan)
មុនពេលឈានទៅដល់ដំណាក់កាលនៃការអនុវត្ត ស៥ ការបណ្តុះបណ្តាលដ៏សមស្របអំពី ស៥ ត្រូវតែផ្តល់ឲ្យសម្រាប់គ្រប់គ្នា្ននៅកន្លែងធ្វើការ។ បន្ទាប់មកក្រុមប្រឹក្សា ស៥ ចាំបាច់ត្រូវតែបង្កើត។ ក្រុមប្រឹក្សា ស៥ ត្រូវបង្កើតតំបន់ ស៥ និងកំណត់ពីគោលបំណង គោលដៅ និងដំណាក់នៃការអនុវត្ត ស៥ ។ ផែនការសកម្មភាព (Action plan)ត្រូវតែចាប់អនុវត្តបន្ទាប់ពីគ្រោងរួចរាល់ ហើយកម្មវិធី ស៥ ចាប់ផ្តើមប្រតិបត្តិ។
ខ. ការអនុវត្ត (Do)
សម្រិតសម្រាំង៖ កំណត់នូវរបស់ដែលចាំបាច់ និងមិនចាំបាច់ ហើយធ្វើបញ្ជីកត់ត្រារបស់ដែលចាំបាច់ទាំងអស់។
សណ្តាប់ធ្នាប់៖ បន្ទាប់ពីកំណត់នូវរបស់ដែលចាំបាច់ រកមធ្យោបាយដោះស្រាយការរៀបចំរបស់ចាំបាច់។
សំអាត៖ កំណត់រកប្រភពធូលីជាមួយនឹងការរកឫសគល់ដែលធ្វើឲ្យមានធូលី។ សកម្មភាពចាំបាច់មួយចំនួន ដែលចាំបាច់សម្រាប់បំបាត់ប្រភពធូលី និងមូលហេតុជាឫសគល់ដែលធ្វើឲ្យមាន ធូលីត្រូវធ្វើជាគ្រោងឡើង។
ស្តង់ដា៖ បន្ទាប់ពីការគ្រោងផែនការណ៍សកម្មភាពលើកិច្ចការដែលទទួលខុសត្រូវត្រូវបានកំណត់ និងប្រតិបត្តិ សកម្មភាពទាំងនោះត្រូវរក្សានូវលក្ខខណ្ឌដែលបានដែលបានគ្រោងទុក។ កំណត់អ្នកទទួលខុសត្រូវ បន្ទាប់មកសម្រេចពីពេលវេលា ទីកន្លែង ក្បួនសម្រាប់ការអនុវត្តនូវសកម្មភាពទាំងនោះ។
ស្ថិតស្ថេរ៖ ការបណ្តុះបណ្តាល និងការអប់រំអាចធ្វើឲ្យគ្រប់គ្នាយល់ គោរព និងអនុវត្តនូវបទបញ្ជា និងក្បួន ដែលបានបង្កើតឡើង។ ការយល់អាចជួយដល់ការខិតខំប្រឹងប្រែងជាបន្តបន្ទាប់ក្នុងការរក្សា បាននូវលក្ខខណ្ឌស្ថិតស្ថេរដែលចង់បាន។
គ. ការត្រួតពិនិត្យ (Check)
បន្ទាប់ពីការអនុវត្តចាំបាច់ត្រូវមានការវាស់វែងមួយដ៏ត្រឹមត្រូវ ។ ការប៉ាន់ប្រមាណពីទំហំនៃការអនុវត្តអាច ត្រូវបានធ្វើឡើង ដោយការបញ្ចូលនូវសវនកម្មផ្ទៃក្នុង ស៥ ។
ឃ. សកម្មភាពកែលំអ (Act)
សម្រាប់ការកែលំអជាប្រចាំ អ្នកដែលពាក់ព័ន្ធក្នុងការអនុវត្ត ស៥ ទាំងអស់ត្រូវធ្វើឲ្យការអនុវត្តក្លាយទៅ ជាទំលាប់។ គោលដៅជាក់ស្តែងគួរតែត្រូវបានធ្វើការប្រៀបធៀបជាមួយគោលដៅដែលបានកំណត់ទុក សម្រាប់កំឡុងពេលដែលបានកំណត់។ ដើម្បីលើកទឹកចិត្ត រង្វាន់គួរតែត្រូវបានផ្តល់ឲ្យដើម្បីទទួលស្គាល់ពី ការខិតខំប្រឹងប្រែងរបស់និយោជិក។
ស៥ និងការកែលំអកន្លែងធ្វើការ
ស៥ និងការកែលំអកន្លែងធ្វើការ
ដោយ សឿ ចំណាន
១. អ្វីទៅជា ស៥?
ស៥ ជាប្រព័ន្ធសម្រាប់កាត់បន្ថយភាពខ្ជះខ្ជាយ និងធ្វើឲ្យប្រសើរឡើងនូវលក្ខខណ្ឌកន្លែងធ្វើការ។ ស៥ ជាវិធីសាស្រ្តសម្រាប់រៀបចំកន្លែងធ្វើការដែលក្លាយមកពីភាសាជប៉ុនប្រាំពាក្យគឺ
- Seiri សម្រិតសម្រាំង
- Seiton សណ្តាប់ធ្នាប់
- Seiso សំអាត
- Seiketsu ស្តង់ដា និង
- Shitsuke ស្ថិតស្ថេរ
ស៥ ជួយអភិវឌ្ឍន៍បរិយាកាសកន្លែងធ្វើការដោយធ្វើឲ្យឧបករណ៍ បរិក្ខារ ម៉ាស៊ីនមានភាពប្រសើរឡើងដើម្បីឲ្យកន្លែងធ្វើការមានសុវត្ថិភាព មានប្រសិទ្ធភាព ភាពរីករាយនិងមានផលិតភាពខ្ពស់ឡើងដោយការប្រើប្រាស់វិធីត្រឹមត្រូវ។ ស៥ ក៏បានចូលរួមចំណែកដល់ការរីកចំរើនផ្នែកធនធានមនុស្ស តាមរយៈការបណ្តុះគំនិតធ្វើការរួមគ្នា និងចូលរួមថែរក្សាសម្ភារៈនៅកន្លែងធ្វើការ។ ការអនុវត្តន៍ ស៥ មួយជំហានម្តងៗ សន្សឹមៗនិងបន្តជាប់គ្នារហូតជាចំនុចមួយសំខាន់បំផុតដើម្បីបង្កើតវប្បធម៌រៀបចំដ៏រឹងមាំមួយនៅកន្លែងធ្វើការ។ ដើម្បីឲ្យការអនុវត្ត ស៥ ទទួលជោគជ័យចាំបាច់ត្រូវមានការវាស់វែងមួយដ៏ត្រឹមត្រូវ។ សវនកម្ម ស៥ ត្រូវបានគេចាត់ទុកជាផ្នែកមួយ ខណៈដែលវាជាឧបករណ៍យ៉ាងសំខាន់ដើម្បីឲ្យប្រាកដពីភាពត្រឹមត្រូវនៃការអនុវត្ត ស៥ ក្នុងកន្លែងធ្វើការ។ តាមរយៈសវនកម្ម ស៥ អាចឲ្យក្រុមហ៊ុនកំណត់ពីកម្រិតសក្តានុពលភាពនៃគុណភាពកែលំអ និង អាចវាយតម្លៃពីភាពខ្លាំង និងខ្សោយនៃការអនុវត្ត ស៥ ទៅតាមផ្នែកនីមួយៗក្នុងក្រុមហ៊ុន។
២. ប្រវត្តិនៃការបង្កើត ស៥
ស៥ ត្រូវបានបង្កើត និងយកទៅអនុវត្តដំបូងបង្អស់នៅក្នុងប្រទេសជប៉ុន។ នៅក្រោយសង្រ្គាមលោកទី២ រោងចក្រ សហគ្រាសភាគច្រើននៅជប៉ុនត្រូវបានបំផ្លាញ។ ក្នុងគោលបំណងសំអាត និងប្រមូលយកនូវរបស់របរដែលមិនប្រើប្រាស់ចេញពីរោងចក្រគោលគំនិត ស៥ ត្រូវបានគេបង្កើតឡើង។ ស៥ ត្រូវបានអនុវត្តដំបូងដោយក្រុមហ៊ុនតូយូតា (Toyota) នៅក្នុងទសវត្ស១៩៧០ និងក្រោយមកត្រូវបានបំលែងទៅជា Lean Manufacturing នៅសហរដ្ឋអាមេរិច។ ស៥ ជាគោលគំនិតនៅក្នុង TPSរបស់ក្រុមហ៊ុនតូយូតាដែលបង្កើតឡើងដោយប្រធាន ក្រុមហ៊ុនតូយូតាគឺលោក Sakichi Toyoda និងកូនប្រុសរបស់គាត់Kiichiro រួមជាមួយនឹងប្រធានវិស្វករ Taiichi Ohno ដែលបានអភិវឌ្ឍន៍នូវវិធីសាស្រ្ត ស៥ ឬអ្វីដែលគេហៅថា Total Product System (TPS) នៅក្រោយសង្រាមលោកលើកទី២។ ក្រោយមកនៅឆ្នាំ១៩៩៥ Hiroyuki Hirano ក៏បានអភិវឌ្ឍន៍ ស៥ ជាមួយនឹងដំណោះស្រាយរបស់គាត់នៅក្នុងប្រព័ន្ធផលិតកម្ម និងបានបោះពុម្ពជាសៀវភៅដែលមានចំណងជើងថា 5 Pillars of the Visual Workplace និងសៀវភៅអំពី ស៥ ជាច្រើនទៀត។
៣. ទស្សនៈវិជ្ជា ស៥
ស៥ ត្រូវបានគេចាត់ទុកថាជាផ្នែកគ្រឹះមួយនៃវប្បធម៌ និងសង្គមជប៉ុនជាច្រើនទសវត្សមកហើយបន្ទាប់ពីសង្គ្រាមលោកលើកទី២។ ស៥ បង្កើតនូវសកម្មភាពកែលំអសម្រាប់សមាជិកទាំងអស់ក្នុងក្រុមហ៊ុន និងសម្រាប់បុគ្គលម្នាក់ៗ។ នៅជប៉ុន ស៥ ត្រូវបានគេយកទៅអនុវត្តគ្រប់ទីកន្លែងរួមមាន នៅតាមផ្ទះ សាលារៀន សហគមន៍ និងកន្លែងធ្វើការដោយគ្មានការលើកលែង។ នៅពេលដែលបញ្ហាមួយមិនត្រូវបានគេរកឃើញ ការអនុវត្ត ស៥ អាចជួយលាតត្រដាងពីបញ្ហាដែលលាក់ ទុក។ ស៥ ត្រូវបានគេបែងចែកជាគោលគំនិត ៣សំខាន់ៗ គឺរបៀបរៀបរយ ភាពស្អាត និងទំលាប់ដោយអាស្រ័យទៅលើការអនុវត្ត។
របៀបរៀបរយ៖ គោលគំនិតសំខាន់នៃរបៀបរៀបរយរួមមាន សម្រិតសម្រាំង និងសណ្តាប់ធ្នាប់របស់ដែលមិនចាំបាច់។ របៀបរៀបរយ សម្រិតសម្រាំងរាល់របស់ដែលមិនចាំបាច់ទាំងអស់ធ្វើឲ្យដំណើរការងាយស្រួល និងផ្តល់ទំនាក់ទំនងទៅនឹងការទទួលខុសត្រូវរបស់គេតាមរយៈការកាត់បន្ថយការងារ និងកំហុសរបស់បុគ្គល។ របៀបរៀបរយមានន័យថាដាក់របស់របរតាមរបៀបជាប្រព័ន្ធជាមួយតួនាទីជាក់លាក់ ឬក្បួនរបស់វា ដូចនេះក្នុងពេលអនាគតវានឹងកាត់បន្ថយបន្ទុកការងារ និងកំហុសបុគ្គល។ វាក៏ត្រូបានកំណត់ផងដែរថា វត្ថុដែលត្រឹមត្រូវគឺដាក់នៅកន្លែងត្រឹមត្រូវ ដូច្នោះមនុស្សអាចរកសម្ភារៈបានដោយងាយស្រួលនៅពេលណា និងកន្លែងណាដែលពួកគេត្រូវការ។
ភាពស្អាត៖ គោលគំនិតសំខាន់នៃភាពស្អាតមានសំអាត និងស្តង់ដា។ ការសំអាត និងការរៀបចំប្រព័ន្ធមិនអាចអនុវត្តទៅបានដោយគ្មានស្តង់ដានោះទេ ដែលវានឹងនាំឆ្ពោះទៅរកការបាត់បង់ប្រសិទ្ធភាពជាមួយពេលវេលា។ ដោយសារការរក្សាភាពស្អាតនៅកន្លែងធ្វើការ គ្រប់គ្នាអាចដឹងដោយស្រួលនូវកំហុសថ្មីៗដែលកើតឡើងបានភ្លាម។ តាមរយៈការសំអាតគេអាចត្រួតពិនិត្យរាល់បញ្ហាដែលកើតមាន ឬបញ្ហាដែលបម្រុងកើតមានដូចនេះសុវត្ថិភាព សុខមាលភាព និងសុខភាពនឹងត្រូវបង្កើនមួយកម្រិត។
ទំលាប់៖ ទំលាប់អាចទទួលបានតាមរយៈវប្បធម៌ ការបណ្តុះបណ្តាល និងការអប់រំហើយត្រូវបានអនុវត្តជាមួយប្រព័ន្ធ ស៥ ដើម្បីធ្វើស្តង់ដាកន្លែងធ្វើការ។ តាមរយៈការបណ្តុះបណ្តាលនិងការអប់រំបានបង្កើនកម្រិតសីលធម៌ដែលនឹងនាំទៅរកការបង្កើតគុណភាពកន្លែងធ្វើការ និងស្តង់ដាការងារ។
៤. ការអនុវត្ត ស៥
៤.១ ការចាប់ផ្តើមការអនុវត្តជាមួយ ស៥
ដំណោះស្រាយ ស៥ ជាវិធីសាស្ត្រសាមញ្ញ និង មានលក្ខណៈជាប្រព័ន្ធដែលអាចយកមកប្រើ និងអនុវត្តបាននៅគ្រប់ទំហំ និងគ្រប់ប្រភេទនៃស្ថាប័ន។ ប៉ុន្តែការអនុវត្ត ស៥ មិនមែនជាការងារងាយស្រួលនោះទេ។ ដើម្បីចាប់ផ្តើមការអនុវត្ត ស៥ ជាជំហានៗ គ្រប់ដំណាក់កាលនៃការអនុវត្តត្រូវតែធ្វើការវិភាគឲ្យបានហ្មត់ចត់ហើយអាចបញ្ចូលដោយប្រើប្រាស់ដំណោះស្រាយវដ្ដ PDCA ។
ក. ការធ្វើផែនការណ៍ (Plan)
មុនពេលឈានទៅដល់ដំណាក់កាលនៃការអនុវត្ត ស៥ ការបណ្តុះបណ្តាលដ៏សមស្របអំពី ស៥ ត្រូវតែផ្តល់ឲ្យសម្រាប់គ្រប់គ្នា្ននៅកន្លែងធ្វើការ។ បន្ទាប់មកក្រុមប្រឹក្សា ស៥ ចាំបាច់ត្រូវតែបង្កើត។ ក្រុមប្រឹក្សា ស៥ ត្រូវបង្កើតតំបន់ ស៥ និងកំណត់ពីគោលបំណង គោលដៅ និងដំណាក់នៃការអនុវត្ត ស៥ ។ ផែនការសកម្មភាព (Action plan) ត្រូវតែចាប់អនុវត្តបន្ទាប់ពីគ្រោងរួចរាល់ ហើយកម្មវិធី ស៥ ចាប់ផ្តើមប្រតិបត្តិ។
ខ. ការអនុវត្ត (Do)
សម្រិតសម្រាំង៖ កំណត់នូវរបស់ដែលចាំបាច់ និងមិនចាំបាច់ ហើយធ្វើបញ្ជីកត់ត្រារបស់ដែលចាំបាច់ទាំងអស់។
សណ្តាប់ធ្នាប់៖ បន្ទាប់ពីកំណត់នូវរបស់ដែលចាំបាច់ រកមធ្យោបាយដោះស្រាយការរៀបចំរបស់ ចាំបាច់។
សំអាត៖ កំណត់រកប្រភពធូលីជាមួយនឹងការរកឫសគល់ដែលធ្វើឲ្យមានធូលី។ សកម្មភាពចាំបាច់មួយចំនួនដែលចាំបាច់សម្រាប់បំបាត់ប្រភពធូលី និងឫសគល់ដែលធ្វើឲ្យមានធូលីត្រូវធ្វើជាគ្រោងឡើង។
ស្តង់ដា៖ បន្ទាប់ពីការគ្រោងផែនការណ៍សកម្មភាពលើកិច្ចការដែលទទួលខុសត្រូវត្រូវបានកំណត់ និងប្រតិបត្តិ សកម្មភាពទាំងនោះត្រូវរក្សានូវលក្ខខណ្ឌដែលបានដែលបានគ្រោងទុក។ កំណត់អ្នកទទួលខុសត្រូវ បន្ទាប់មកសម្រេចពីពេលវេលា ទីកន្លែង ក្បួនសម្រាប់ការអនុវត្តនូវសកម្មភាពទាំងនោះ។
ស្ថិតស្ថេរ៖ ការបណ្តុះបណ្តាល និងការអប់រំអាចធ្វើឲ្យគ្រប់គ្នាយល់ គោរព និងអនុវត្តនូវបទបញ្ជា និងក្បួនដែលបានបង្កើតឡើង។ ការយល់អាចជួយដល់ការខិតខំប្រឹងប្រែងជាបន្តបន្ទាប់ក្នុងការរក្សាបាននូវលក្ខខណ្ឌស្ថិតស្ថេរដែលចង់បាន។
គ. ការត្រួតពិនិត្យ (Check)
បន្ទាប់ពីការអនុវត្តចាំបាច់ត្រូវមានការវាស់វែងមួយដ៏ត្រឹមត្រូវ ។ ការប៉ាន់ប្រមាណពីទំហំនៃការ អនុវត្តអាចត្រូវបានធ្វើឡើងដោយការបញ្ចូលនូវសវនកម្មផ្ទៃក្នុង ស៥ ។
ឃ. សកម្មភាពកែលំអ (Act)
សម្រាប់ការកែលំអជាប្រចាំ អ្នកដែលពាក់ព័ន្ធក្នុងការអនុវត្ត ស៥ ទាំងអស់ត្រូវធ្វើឲ្យការអនុវត្តក្លាយទៅជាទំលាប់។ គោលដៅជាក់ស្តែងគួរតែត្រូវបានធ្វើការប្រៀបធៀបជាមួយគោលដៅដែលបានកំណត់ទុកសម្រាប់កំឡុងពេលដែលបានកំណត់។ ដើម្បីលើកទឹកចិត្ត រង្វាន់គួរតែត្រូវបានផ្តល់ឲ្យដើម្បីទទួលស្គាល់ពីការខិតខំប្រឹងប្រែងរបស់និយោជិក។
៤.២ ជំហានក្នុងការអនុវត្ត ស៥
ក. ការបង្កើតក្រុមប្រឹក្សា ស៥
ក្រុមប្រឹក្សា ស៥ ត្រូវបានបង្កើតជាមួយនឹងគោលបំណងបង្កើននូវការចូលរួមរបស់និយោជិកនៅគ្រប់កម្រិត និង ដើម្បីអភិវឌ្ឍន៍នូវវប្បធម៌កែលំអជាប្រចាំ និងចរិកធ្វើការជាក្រុម។ រូបភាពទី០១ ផ្តល់នូវរចនាសម្ព័ន្ធគ្រឹះសម្រាប់ដំណើរការអនុវត្ត ស៥ ។
រូបភាពទី០១៖ រចនាសម្ព័ន្ធគណៈកម្មការដឹកនាំសម្រាប់ការអនុវត្ត ស៥
គណៈកម្មការដឹកនាំ ស៥ (5S Steering Committee) រួមមានសមាសភាពប្រធានស្ថាប័នជាអ្នកណែនាំ អ្នកគ្រប់គ្រងទូទៅជាប្រធាន ស៥ និងអ្នកតំណាងប្រធានផ្នែកជាអ្នកសម្របសម្រួល។ គណៈកម្មការ ស៥ មានតួនាទីបង្កើតគម្រោងអនុវត្ត ស៥ និងជ្រើសរើសសមាជិកក្រុមអាស្រ័យលើសមត្ថភាព ការតំណាងឲ្យស្ថាប័ន និងជំនាញ។ ការទទួលខុសត្រូវក្នុងការអនុវត្ត ស៥ ត្រូវតែធ្វើឡើងនៅទូទាំងស្ថាប័ន។ គ្រប់គ្នានៅកន្លែងធ្វើការត្រូវតែដឹងពីការទទួលខុសត្រូវរបស់ខ្លួន និងអាចអនុវត្ត តួនាទីរបស់ខ្លួនបាន។ ថ្នាក់ដឹកនាំរបស់ក្រុមហ៊ុនជាអ្នកទទួលខុសត្រូវដោយយោងទៅតាមការទទួលខុសត្រូវនីមួយៗ។ គណៈកម្មការដឹកនាំ ស៥ ក៏ត្រូវតែតែងតាំងអ្នកសម្របសម្រួល ស៥ អ្នកសម្រួល ស៥ និងប្រធាន ស៥ សម្រាប់ផ្នែកនីមួយៗផងដែរ។
អ្នកសម្របសម្រួល ស៥ (5S Coordinator) ត្រូវការដើម្បីទំនាក់ទំនងជាមួយគ្រប់គ្នាដែលចូលរួម។ គាត់មានតួនាទីសម្រួលដល់សកម្មភាពអនុវត្តការងារជាក្រុម។ គាត់ក៏មានតួនាទីលើកទឹកចិត្ត និងតាមដានសកម្មភាពនៃការអនុវត្តដើម្បីឲ្យប្រាកដថាមានការចូលរួម។ ក្នុងនាមជាស្ថាប័នមួយ អ្នកសម្របសម្រួលដើរតួនាទីជាប្រភពនៃព័ត៌មាន។
អ្នកសម្រួល ស៥ (5S Facilitators) ជួយគាំទ្រការអនុវត្ត ស៥ ដោយធ្វើទំនាក់ទំនងជាមួយគ្រប់គ្នាដែលចូលរួម លើកទឹកចិត្តដល់ការធ្វើការងារជាក្រុម ធានាថានិយោជិកបានអនុវត្តតាមផែនការ និងចុងក្រោយតាមដានការការវាស់វែងជាប្រព័ន្ធ។
ប្រធាន ស៥ (5S Chairman) ចូលរួមក្នុងការងារដំណើរការអនុវត្តជាក្រុមដោយទំនាក់ទំនងជាមួយគ្រប់គ្នាដែលពាក់ព័ន្ធ និងតាមដានដំណើរការសកម្មភាពជាក្រុម។
ខ. ការបង្កើតតំបន់ ស៥
អ្នកសម្រប សម្រួល ស៥ នឹងទទួលខុសត្រូវសម្រាប់ការកំណត់តំបន់ ស៥ ។ អ្នកសម្រួល ស៥ នឹងទទួលខុសត្រូវសម្រាប់ការចាត់ចែងការទទួលខុសត្រូវ។ ពួកគេគួរតែបែងចែកសកម្មភាពទៅតាមកិច្ចការដែលអាចគ្រប់គ្រងបាន។ កិច្ចការនេះអាចសម្រេចទៅបានដោយការធ្វើគំនូរព្រាងកន្លែងធ្វើការទាំងមូល និងបែងចែកផ្នែកនីមួយៗទៅជាតំបន់តូចៗ។ បន្ទាប់មកចាត់ចែងឲ្យក្រុមមួយទៅផ្នែកមួយ និងបង្ហាញឈ្មោះសមាជិកនៃក្រុមនីមួយៗ និងតំបន់របស់ពួកគេ។ ដោយធ្វើដូច្នោះ ពួកគេត្រូវតែធានាថាយ៉ាងហោចណាស់មានមនុស្សម្នាក់ត្រូវបានចាត់ចែងទៅតាមផ្នែកនីមួយៗ និងប្រធានម្នាក់សម្រាប់គ្រប់ក្រុមទាំងអស់។ លើសពីនេះទៅទៀត គេត្រូវតែប្រាកដថាទំហំផ្នែក និងសមត្ថភាពក្រុមគឺសមស្របទៅនឹងទំហំនៃការទទួលខុសត្រូវ។ ក្នុងករណីកន្លែងធ្វើការរួម ការទទួលខុសត្រូវគួរត្រូវបានកំណត់ឲ្យបានច្បាស់ដើម្បីជៀសវាងភាពមិនច្បាស់លាស់ផ្សេងៗ។
គ. ការបណ្តុះបណ្តាល ស៥
គណៈកម្មការបណ្តុះបណ្តាល ស៥ ក៏ត្រូវបានបង្កើតឡើងជាមួយគោលបំណងចែកចាយនូវវិធីសាស្រ្ត និងការរៀបចំកំលាំងធ្វើការសម្រាប់ការចូលរួមក្នុងសកម្មភាពស៥។ កម្មវិធីបណ្តុះបណ្តាលនេះជាចំនុចចាប់ផ្តើមនៃការអនុវត្ត ស៥ និងលើទឹកចិត្តដល់កម្មករឲ្យចូលរួមសកម្មក្នុងការអនុវត្ត ស៥។ ការបណ្តុះបណ្តាលអាចត្រូវបានផ្តល់ឲ្យតាមរយៈការបណ្តុះបណ្តាលផ្ទៃក្នុង និងខាងក្រៅ។ សម្រាប់ការបណ្តុះបណ្តាលផ្ទៃក្នុងអាចផ្តល់ឲ្យតាមវិធីសាស្ត្របទពិសោធបុគ្គល ការចូលរួមក្នុងគម្រោង ការចែករំលែកការងារ និងការផ្លាស់ប្តូរភារកិច្ច។ ការបណ្តុះបណ្តាលខាងក្រៅអាចផ្តល់តាមរយៈការបញ្ជូននិយោជិកឲ្យចូលរួមក្នុងសិក្សាសាលា ឬសន្និសិទនានា។ នៅពេលដំណាក់កាលដំបូងនៃការបណ្តុះបណ្តាលត្រូវបានបញ្ចប់ គ្រប់គ្នានឹងមានចំណេះដឹងមូលដ្ឋានគ្រឹះអំពី ស៥ ហើយអាចឆ្លើយតបទៅនឹងសកម្មភាពដែលកំពុងដំណើរការ។ ផែនការដែលពណ៌នាពីដំណាក់កាលនៃការអនុវត្ត ស៥ ត្រូវតែរៀបចំនិងបង្ហាញកំឡុងពេលនៃការ បណ្តុះបណ្តាលនេះដែរ។ កំហុសភាគច្រើនដែលកើតឡើងនៅពេលអនុវត្តប្រព័ន្ធ ស៥ គឺបរាជ័យនូវការបណ្តុះបណ្តាលសមស្របនៅដំណាក់កាលដំបូង។ ការបណ្តុះបណ្តាលគួរតែរួមបញ្ចូលនូវចំណេះដឹង ស៥ សម្រាប់ថ្នាក់ដឹកនាំកំពូលនិងប្រតិបត្តិករ ការអនុវត្ត ស៥ សម្រាប់អ្នកសម្រួល និងសវនកម្ម ស៥ ផ្ទៃក្នុងសម្រាប់ទាំងអស់គ្នា។
ឃ. ការចាប់ដំណើរការ ស៥
គោលបំណងសំខាន់នៅត្រង់ចំនុចនេះ គឺដើម្បីប្រកាសពីផែនការណ៍លើកកំពស់សម្រាប់ការបង្កើតសកម្មភាព ស៥ ។ អ្នកគ្រប់គ្រងត្រូវតែផ្តល់នូវការគាំទ្រគម្រោង ស៥ កំណត់ទិសដៅ គោលនយោបាយ និងគោលដៅសម្រាប់ការអនុវត្ត ស៥ ជាជំហានៗ។ ជាមួយនឹងការប្រកាសពី ស៥ គេគួរតែប្រកាសពីគោលនយោបាយ ស៥ គោលបំណង និងគោលដៅ តំបន់ដែលត្រូវអនុវត្ត ស៥ និង ពាក្យស្លោក ស៥ ។
ង. ការអនុវត្ត សទី១ (សម្រិតសម្រាំង)
ដើម្បីអនុវត្ត សទី១ ជាទូទៅដំណើរការភ្ជាប់ស្លាកក្រហម (Red-tag) ត្រូវបានគេយកមកប្រើប្រាស់។ យុទ្ធសាស្រ្តភ្ជាប់ស្លាកក្រហមជួយកំណត់ពីរបស់ដែលមិនចាំបាច់ និងកំណត់ពីអត្តប្រយោជន៍របស់វា។ មាន
៦ដំណាក់កាលដែលរួមចំណែកក្នុងការធ្វើឲ្យដំណើរការភ្ជាប់ស្លាកក្រហមទទួលបានជោគជ័យ។
១. ការចាប់ដំណើរការភ្ជាប់ស្លាកក្រហម
គណៈកម្មការដឹកនាំ ស៥ ត្រូវបង្កើតតំបន់ និងផែនការសម្រាប់ការបោះចោលរបស់ដែលមិនចាំបាច់ដោយប្រើទម្រង់ភ្ជាប់ស្លាកក្រហម។
២. ការកំណត់ពីទិសដៅភ្ជាប់ស្លាកក្រហម
កំណត់ពីប្រភេទរបស់ និងកន្លែងធ្វើការដែលត្រូវវាយតម្លៃ។
៣. បង្កើតលក្ខខណ្ឌវិនិច្ឆ័យសម្រាប់ការភ្ជាប់ស្លាកក្រហម
មាន៣ សំណួរដែលចាំបាច់ត្រូវតែសួរដើម្បីកំណត់ថាតើរបស់មួយចាំបាច់ដែរឬទេ។
· តើវាចាំបាច់ឬទេ?
· តើវាត្រូវការញឹកញាប់ឬទេ?
· តើវាចាំបាច់ប៉ុនណា?
៤. ការភ្ជាប់ស្លាកក្រហម
ព្រឹត្តិការណ៍ភ្ជាប់ស្លាកក្រហមត្រូវតែធ្វើយ៉ាងរហ័ស និងដាច់ខាត។ ទំហំគោលដៅត្រូវតែធ្វើឲ្យរួចរាល់មុនការអនុវត្ត ស៥ ចាប់ផ្តើម។
៥. ការវាយតម្លៃរបស់ដែលភ្ជាប់ស្លាកក្រហមរួចហើយ
កំណត់ថាអ្វីដែលត្រូវដកចេញ និងសកម្មដែលត្រូវការ។
៦. ការធ្វើឯកសារលទ្ធផលនៃការភ្ជាប់ស្លាកក្រហម
លទ្ធផលដែលទទួលបាន ត្រូវតែច្បាស់លាស់សម្រាប់គោលបំណងរាប់ចំនួនដើម្បីឲ្យស្ថាប័នអាចវាស់វែងពីការកែលំអ និងភាពទុកចិត្តលើដំណើរការ។
សម្រិតសម្រាំង ជាវិធីសាស្រ្តដ៏ប្រសើរបំផុតសម្រាប់កែប្រែកន្លែងធ្វើការដែលគ្មានសណ្តាប់ធ្នាប់ឲ្យទៅជាកន្លែងធ្វើការដែលមានរបៀបរៀបរយដើម្បីកែលំអប្រសិទ្ធភាព និងសុវត្ថិភាព។
រូបភាពទី០២៖ គម្រោងសកម្មភាព សទី១
នៅពេលការភ្ជាប់ស្លាកក្រហមរួចរាល់ សកម្មភាពដែលត្រូវអនុវត្តបន្តមានដូចក្នុងរូបភាពទី០២ ចរន្តការងារត្រូវបានកាត់បន្ថយ ទំនាក់ទំនងរវាងកម្មករត្រូវបានធ្វើឲ្យប្រសើរឡើង និងផលិតភាពក៏ត្រូវបានបង្កើន។
ច. ការអនុវត្ត សទី២ (សណ្តាប់ធ្នាប់)
សទី២ សង្កត់ធ្ងន់ទៅលើសុវត្ថិភាព ប្រសិទ្ធភាព និងប្រសិទ្ធភាពកន្លែងស្តុកទុកដែលជាលទ្ធផលបង្កើននូវរូបរាងកន្លែងធ្វើការ។ នៅពេលដែលសទី១បានអនុវត្តដោយជោគជ័យហើយ អ្វីដែលនៅសល់ត្រូវរៀបចំដូច្នោះវាងាយស្រួលដល់ការយកមកប្រើប្រាស់ និងស្តុកទុក។ សណ្តាប់ធ្នាប់ជួយបំបាត់នូវភាពខ្ជះខ្ជាយក្នុងផលិតកម្ម ឫសកម្មភាពដែលមិនចាំបាច់ និងប្រាកដថារាល់សម្ភារៈ ឧបករណ៍ និងបរិក្ខារបានរៀបចំទុកដាក់នៅកន្លែងដែលងាយស្រួលយកមកប្រើប្រាស់។ រៀបចំវត្ថុប្រើប្រាស់ផ្ទាល់ខ្លួន និងរួមគ្នាទៅតាមភាពញឹកញាប់នៃការប្រើប្រាស់។ កន្លែង សម្ភារៈ ផលិតផលត្រូវមានសញ្ញា និងពណ៌សំគាល់ដើម្បីងាយស្រួលដល់អ្នកផ្សេងមករកនៅពេលដែលម្ចាស់កន្លែងមិននៅ។ បរិវេណគ្រោះថ្នាក់ត្រូវដាក់សញ្ញាសំគាល់ឲ្យបានច្បាស់ ដូច្នោះសុវត្ថិភាពជាទូទៅត្រូវបានធ្វើឲ្យប្រសើរឡើង។ នៅពេលរបៀបរៀបរយត្រូវបានបង្កើត រយៈពេលនៃការរករបស់ត្រូវបានកាត់បន្ថយ កំលាំងពលកម្មក៏ត្រូវបានកាត់បន្ថយ និងមិនលើសកន្លែងស្តុកទុក។
រូបភាពទី០៣៖ ផែនការសកម្មភាពសទី២
ឆ. ការអនុវត្ត សទី៣ (សំអាត)
ការសំអាតជាប្រចាំអនុញ្ញាតឲ្យគេអាចកំណត់ និងបំបាត់នូវប្រភពនៃភាពរញ៉េរញ៉ៃ និងរក្សាបាននូវភាពស្អាតនៅកន្លែងធ្វើការ។ កំឡុងពេលនៃការសំអាត វាក៏ត្រូវពិនិត្យពីភាពស្អាតរបស់ម៉ាស៊ីន កន្លែងធ្វើការ កម្រាល ភាពណែនចង្អៀតនៃឧបករណ៍ និងប្រភពពន្លឺជាដើម។ ភាពមិនអាចខ្វះបានគឺការយកចិត្តទុកដាក់ និងរក្សានូវសណ្តាប់ធ្នាប់របស់ប្រតិបត្តិករ។ គ្រប់គ្នារីករាយនឹងធ្វើការនៅកន្លែងមួយដែលមានបរិស្ថានស្អាតដែលអាចបង្កើននូវសីលធម៌ និងផលិតភាព។ ការសំអាតជាការទទួលខុសត្រូវរបស់និយោជិកទាំងអស់ ហើយកន្លែងធ្វើការត្រូវតែចែកទៅជាបរិវេណស្អាតផ្សេងៗពីគ្នាដែលអាចផ្អែកទៅលើតំបន់ ស៥ ឬកាលវិភាគ ស៥ ។ អ្នកសម្រួលត្រូវតែកំណត់ថាអ្វីដែលត្រូវសំអាត ប្រើវិធីសាស្ត្រអ្វី រៀបចំឧបករណ៍ និងសម្ភារៈសម្រាប់សំអាត និង អនុវត្តការសំអាតដោយអ្នកណា។
ជ. ការអនុវត្ត សទី៤ (ស្តង់ដា)
ការបន្តការអនុវត្ត ស៣ ជាប្រចាំនឹងធានាបាននូវស្តង់ដាខ្ពស់មួយនៅកន្លែងធ្វើការ។ នៅពេលដែលសទាំងបីត្រូវបានអនុវត្តដោយជោគជ័យហើយជំហានបន្ទាប់គឺផ្តោតទៅការធ្វើស្តង់ដាការអនុវត្តល្អបំផុត។ គម្រោងត្រូវតែរួមបញ្ចូលនូវការបង្កើតក្បួន និងទម្រង់វាយតម្លៃប្រចាំថ្ងៃដែលអាចមើលឃើញនៅគ្រប់កន្លែងធ្វើការ។ តារាងតាមដានត្រូវតែរៀបចំឲ្យមានកន្លែងចុះហត្ថលេខាដើម្បីធានាថាសទាំងបីត្រូវបានអនុវត្តជាទំលាប់និងជាការអនុវត្តល្អបំផុតនៅកន្លែងធ្វើការ។
ឈ. ការអនុវត្ត សទី៥ (ស្ថិតស្ថេរ)
សទី៥ គឺការធ្វើឲ្យការអនុវត្តសទាំង៤ក្លាយទៅជាទំលាប់ដើម្បីធានាពីស្ថេរភាពរបស់ប្រព័ន្ធ និងការកែលំអដោយលើកកំពស់ប្រសិទ្ធភាពតាមរយៈវដ្ត PDCA ។ នេះអាចសម្រេចទៅបានដោយការកសាងចំណេះដឹងពីសារៈសំខាន់របស់ ស៥ តាមរយៈការបណ្តុះ បណ្តាលឡើងវិញ ការផ្តល់ជារង្វាន់ និងការទទួលស្គាល់នូវការខិតខំប្រឹងប្រែងរបស់និយោជិក និង ប្រើប្រាស់នូវវិធីសាស្រ្ត ដំណោះស្រាយ យុទ្ធសាស្រ្តដើម្បីសកម្មភាពស្ថិតស្ថេរ។ ការបង្កើតទំលាប់ គឺជាឫសគល់នៃ ស៥។ ប្រសិនបើគ្មានការបង្កើតជាទំលាប់ទេ ការរក្សានូវភាពជាប់លាប់នៃស្តង់ដាគុណភាព សុវត្ថិភាព និងភាពស្អាតពិតជាមិនអាចសម្រេចបាននោះទេ។
៥. អត្ថប្រយោជន៍របស់ ស៥
ការអនុវត្ត ស៥ ផ្តល់នូវសុវត្ថិភាព ភាពស្អាត ល្បឿន និងទំនាក់ទំនង។ ភាពស្អាតនៅកន្លែងធ្វើការ ការដកចេញរបស់មិនចាំបាច់ចេញពីកន្លែងធ្វើការ លើកកំពស់នូវការរៀបចំនិងរបៀបររៀបរយ និងបង្កើននូវរូបភាពទំនាក់ទំនងល្អនៅកន្លែងធ្វើការទាំងនេះជាគ្រឹះសំខាន់នៅក្នុងការអនុវត្ត ស៥ ។ តាមរយៈការកាត់បន្ថយនូវពេលវេលា និងសម្ភារៈ ផលិតភាពក៏ត្រូវបានបង្កើនឡើងជាមួយនឹងសុវត្ថិភាព និងការកាត់បន្ថយតម្លៃ។ សព្វថ្ងៃមានក្រុមហ៊ុនជាច្រើនបានអនុវត្តប្រព័ន្ធ ស៥ ជាមួយនឹងលទ្ធផលទទួលបានគួរឲ្យភ្ញាក់ផ្អើល ខណៈដែលមិនមានដំណោះស្រាយណាដែលសាមញ្ញ និងមានប្រសិទ្ធភាពជាងសម្រាប់ការកែលំអដែលអាចអនុវត្តបានដោយចំណាយតិចបំផុត។
៥.១ ផលិតភាព
ក្រុមហ៊ុនទាំងអស់សុទ្ធតែមានបំណងចង់ឲ្យផលិតភាពមានភាពប្រសើរឡើងដូចដែលវាបង្កើនការត្រលប់មកវិញជារួមលើការវិនិយោគ។ ការអនុវត្តនូវដំណើរការ ស៥ អាចផ្តល់នូវការធ្វើឲ្យប្រសើរឡើងទាំងនេះ។ ការដកចេញវត្ថុធាតុ និងរបស់ដែលមិនចាំបាច់ និង ការបង្កើនប្រសិទ្ធភាពនៃកន្លែងធ្វើការអាចជួយធ្វើឲ្យផលិតភាពមានភាពប្រសើរឡើង តាមរយៈការកម្រិតនូវពេលវេលាដែលត្រូវចំណាយ។ ពេលវេលាអាចចំណាយតិចក្នុងការស្វែងរករបស់របរតាមរយៈការរៀបចំដែលងាយស្រួលឃើញ និងងាយស្រួលយកមកប្រើប្រាស់ ឬតាមរយៈគ្រប់គ្រងកន្លែងធ្វើការដែលធ្វើឲ្យងាយស្រួលមើល។ ផលិតភាពក៏ត្រូវបានកែលំអផងដែរតាមរយៈការបង្កើនកាលបរិច្ឆេតនៃការដឹកជញ្ជូន។
៥.២ គុណភាព
គុណភាពក៏ត្រូវបានបង្កើនតាមរយៈការកាត់បន្ថយនូវកំហុស ហើយការអនុវត្តនូវស្តង់ដាបង្កើតឲ្យមានស្ថេរភាពនៃការផលិត។ ភាពងាយស្រួលនៃបរិស្ថានកន្លែងធ្វើការ និងសុវត្ថិភាពធ្វើឲ្យមានភាពចុះសម្រុងគ្នារវាងនិយោជិកដែលនាំឲ្យមានការបង្កើនសីលធម៌ និងទំនាក់ទំនងល្អក្នុងចំណោមនិយោជិក។
៥.៣ តម្លៃ
ស៥ ក៏បានរួមចំណែកក្នុងការកាត់បន្ថយតម្លៃតាមរយៈកាត់បន្ថយនូវកន្លែងស្តុកទុក បរិវេណកន្លែងធ្វើការដែលធ្វើឲ្យក្រុមហ៊ុនចំណាយតិចក្នុងការសាងសង់បន្ថែម។ ការសំអាតបរិស្ថានកន្លែងធ្វើការជាពិសេសនៅក្នុងផលិតកម្ម ការរៀបចំកន្លែងធ្វើការឲ្យមានរបៀបរៀបរយ ការកាត់បន្ថយការធ្វើដំណើរនៅក្នុងបរិស្ថានកន្លែងធ្វើការ និងការដាក់សញ្ញាសំគាល់បរិវេណគ្រោះថ្នាក់អាចកាត់បន្ថយនូវ ហានិភ័យគ្រោះថ្នាក់ដល់និយោជិក។ តាមរយៈការបង្កើននូវសុវត្ថិភាពនៅកន្លែងធ្វើការ ការចំណាយលើគ្រោះថ្នាក់របស់និយោជិកអាចត្រូវបានកាត់បន្ថយ។ ម្យ៉ាងទៀត ការកាត់បន្ថយសំណល់ និងផលិតផលខូចក៏កាត់បន្ថយការចំណាយក្នុងផលិតកម្មផងដែរ។